लढूया, जिंकूया!

शिक्षक बंधू-भगिनींनो,

सप्रेम नमस्कार,
सर्व प्रथम एलफिस्टन रोड येथील दुर्घटनेत जीव गमावलेल्या कुटुंबियांच्या प्रति सहवेदना आणि जे जखमी आहेत त्या सर्वांसाठी प्रार्थना. 

तुम्हा सर्वांना अशोक विजयादशमी दसरा आणि धम्मचक्र प्रवर्तन दिनाच्या शुभेच्छा...!

लोकसत्ता दैनिकाच्या शुक्रवार दि. २९ सप्टेंबर २०१७ रोजीच्या अंकात एक बातमी प्रसिद्ध झाली आहे. 'डॉ. दीपक सावंत, कपिल पाटील यांची प्रतिष्ठा पणाला' या बातमीतील काही मजकूर पुढीलप्रमाणे - 

''मुंबई शिक्षक हा मतदारसंघ पारंपारिकदृष्टय़ा भाजपशी संबंधित संघटनेचा बालेकिल्ला होता. संजीवनीताई रायकर यांनी या मतदारसंघाचे प्रतिनिधित्व केले होते. पण गेल्या दोन निवडणुकांमध्ये लोकभारतीचे कपिल पाटील यांनी विजय मिळविला. सध्या कपिल पाटील आणि भाजपमध्ये संघर्ष सुरू आहे. शिक्षकांचे वेतन मुंबै बँकेत जमा करण्यावरून कपिल पाटील यांनी भाजप व शालेय शिक्षणमंत्री विनोद तावडे यांच्याशी दोन हात केले आहेत. यामुळेच कोणत्याही परिस्थितीत कपिल पाटील यांना पराभूत करण्याचा भाजपचा प्रयत्न असेल.''
http://www.loksatta.com/mumbai-news/deepak-sawant-vs-kapil-patil-teachers-constituency-election-1560892/

वाचा. विचार करा. 

नवीन सरकार आपल्यापासून आपल्या सर्वांची अवस्थाही एलफिस्टन रोड येथील चेंगराचेंगरी सारखीच झालेली आहे. संचमान्यता, कला-क्रीडा शिक्षकांवरील आघात, २००५ नंतरच्या शिक्षकांच्या सेवा समाप्तीचे आदेश, २०१२ नंतरच्या शिक्षकांवर चौकशीची टांगती तलवार, ऑनलाईन कामाचा बोझा, पेन्शन, प्लॅन-नॉन प्लॅन, विनाअनुदानित शिक्षकांचा प्रश्न, रात्रशाळावर सूडबुद्धीने केलेली कारवाई आणि आता त्यांनी आपल्या पगारावर हल्ला केला आहे. गेली काही महिने आपण त्याविरोधात लढतो आहोत. 

धनसत्ता आणि राजसत्ते विरोधातील आपली ही अटीतटीची लढाई आपण मोठ्या धैर्याने आणि निकराने लढतो आहोत. ते केवळ तुम्हा सर्वांच्या पाठिंबा व एकीमुळेच, आपले आमदार कपिल पाटील यांचे मार्गदर्शन आहेच. धनसत्ता आणि राजसत्तेसमोर आपण नमायला तयार नाही हे लक्षात आल्यावर विविध मार्गांनी आपली लढाई, एकी यांना सुरुंग लावायचं काम सुरु आहे. सरकारी पक्षातर्फे कोर्टात या ना त्या कारणाने तारीख पे तारीख चा खेळ सुरु आहे. पगार उशीर होण्यासाठी नाना शक्कली लढवल्या जात आहेत. वरपासून खालपर्यँत सर्व यंत्रणा कोर्टाचे आदेश पायदळी तुडवत आपल्याला त्रास देण्याचा एककलमी कार्यक्रम राबवत आहे. काहींना प्रलोभने  देऊन आपल्याविरोधात लढण्यासाठी पुढे करण्यात येत आहे. अपप्रचार करण्यात येत आहे. काळ कठीण आहे, पण म्हणून घाबरायचं कारण नाही. 

विधान परिषदेतील आपला आवाज दाबण्याचा प्रयत्न होतो आहे. भाजपचा हा डाव आपण सर्वांनी ओळखायला हवा. 

'जब शासक का बुरा वक्त आता है तब वो शिक्षकों पर अत्याचार करता है!' असं आर्य चाणक्य म्हणाला होता. मला खात्री आहे मदांध नंद राजाची सत्ता आपण सर्वजण मिळून उलटवून लावू. सरकारच्या छळातून आपली सुटका करून घ्यायची असेल तर कपिल पाटील सरांचे हात अजून बळकट करूया. सरांच्या पाठीशी ठामपणे उभे राहूया. भाजपच्या जाळ्यात न फसता शिक्षण हक्काची आणि शिक्षक सन्मानाची आपली लढाई मजबूत करूया. लढूया, जिंकूया!


आपला, 
जालिंदर देवराम सरोदे 
प्रमुख कार्यवाह, शिक्षक भारती  
sarodejalindar1@gmail.com